CAGAYAN DE ORO CITY – Ipadugta sa inahan sulod sa prisohan ang lalaki nga kaipon niini kinsa walay kalooy midunggab-patay sa ilang dos anyos nga anak ug laing kuwatro anyos nga anak-babaye ang kritikal sa ospital ning syudad.
Kini human mibati’g naghinobra nga pagselos ang suspek nga si Elmer Canoy Sr nga taga- Brgy Lumbia kay nagduda siya nga dunay laing lalaki ang kaipon niini nga si Katherine Aying kinsa nanarbaho isip katabang sa Gingoog City ning lalawigan.
Namahayag si Gng Katherine nga dili tiaw ang iyang nadawatan nga mga pagpangulata gikan sa suspek ug dakong bakak usab nga duna kini laing ka-relasyon.
Una niini,gigamita’g gunting ug kutsilyo sa suspek ang pagdunggab hinungdang nag-resulta sa kamatayon sa iyang junior sa miaging adlaw.
Samtang mag-atubang sa kasong parricide ug frustrated parricide ang amahan nga walay kalooy midunggab sa iyang duha ka pulos menor de edad nga mga anak.
Kini human gilayong na-kostudiya sa kapolisan ang suspek nga si Elmer Canoy Sr pipila ka oras gikan sa paghitabo sa kremin.
Namahayag si Police Lt Col Evan Viñas,tigpamaba sa Cagayan de Oro City Police Office nga nahikay na ang mga dokumento alang sa pagsang-at sa mga kaso sa piskalya batok suspetsado ning adlawa.
Una niini,namugos ang suspek nga nakainom daw kini ug nawala sa kaugalingo rason nahinaykan ang iyang mga anak.
