CAGAYAN DE ORO CITY – Nagbaton na ang kapolisan sa person of interest o POI sa kamatayon sa usa ka 2-anyos nga batang lalaki sa Purok 3 San Vicente Casinglot Tagoloan, Misamis Oriental.
Gibutyag ni Police Corporal Jackie Lou Malagamba, ang hepe sa Women and Children Protection Desk sa Tagoloan PNP nga gipailalom na nila sa interogasyon ang usa ka POI.
Emosyonal pa nga nanawagan si Malagamba ngadto sa katawhan nga nakasaksi sa kremin nga moaduol kanila aron daling mahatagan sa kasulbaran ang maong kaso.
Una ng nakit-ang patay sulod sa laton nga may tubig ang bata nga wala nay kinabuhi.
Hugot nga nagtoo ang kapolisan nga may foul play sa hitabo.
Samtang may gidudahan si Michael Gubat kon kinsa ang mipatay sa iyang 2-anyos nga anak pinaagi sa paglumos sulod sa laton.
Apan nagdumili kini siya nga panganlan ang iyang gidudahan gumikan sa kawad-on sa mga ebidensya.
Nanawagan na lamang si Gubat sa mga nakakita sa mihimo sa kremin nga mohatag sa impormasyon aron maangkon ang hustisya sa iyang makalolooy nga anak.
