Malampusong nakompiskar sa mga miyembro City Intelligence Unit (CIU) ug Iligan City Police Station 5 (ICPS5) ang daghang armas ug bala sa pag-implementar sa search warrant sa Fortaleza Street, Barangay Poblacion, kagahapon.
Lakip sa nakuha sa operasyon ang usa ka .38 revolver, usa ka improvised nga pusil, lima ka bala sa revolver, upat ka bala sa 5.56 caliber, duha ka bala sa .22 caliber, ug siyam ka bala sa kalibre 45.
Ang search warrant gi-isyu sa Regional Trial Court Branch 4 batok sa usa ka lalaki nga residente sa maong lugar.
Gipahayag sa suspek nga ang .38 revolver gi-prenda lamang kaniya samtang ang improvised handgun gibilin pa sa iyang lolo.
Apan, tungod sa kakulang sa legal nga dokumento ug lisensya, mag-atubang siya sa kasong paglapas sa Republic Act No. 10591 o Comprehensive Firearms and Ammunition Regulation Act.
Gibutyag ni Police Major Zandrex Panolong, tagpamaba sa Iligan City Police Office (ICPO), gikinahanglan nga ang tanang firearms holder molukat sa License to Own and Possess Firearms (LTOPF) sa Regional Civil Security Unit (RCSU) aron malikayan ang pagklasipikar sa ilang armas nga loose firearms.
Gipahimangnoan usab ang publiko nga boluntaryong isurender ang ilang mga pusil ug bala sa kapulisan samtang nagpaabot sa renewal sa ilang lisensya.
“Kung dili marenew sulod sa gitugot nga panahon, ma-forefeit ang pusil pabor sa gobyerno,” matod ni PMaj. Panolong.
Padayon ang kampanya sa kapulisan sa pagdakop sa mga ilegal nga armas aron mapalig-on ang seguridad ug malikayan ang paggamit niini sa krimen.
