CAGAYAN DE ORO CITY – Wala pa hunungi’g hapa-hapa sa mga operatiba sa kapolisan ang motorcycle in tandem suspects nga responsible pagpusil sa duha ka batan-on nga nakisilong sa waiting shed sa Purok 2,Brgy Rebucon,Kolambugan,Lanao del Norte.

Kini human nakasulti pa ang mga biktima nga naglakip kang Joshua Eliaca,22 ug Arnold Jansen Sabate,18 anyos pulos mga ulitawo nga nagpuyo sa lugar sa mga imbestigador nga midalikyat kanila sa gida-an nga ospital sa lalawigan.

Matud ni Police Cpl Rey Kristian Tan,imbestigador sa Kolambugan Police Station nga nahiagom sa pinusilan sa armas nga kalibre 45 ang mga kamot ni Eliaca samtang wala nga paa usab si Sabate sa maong kremin.

Pagsaysay ni Tan subay sa gitug-an sa mga biktima nga unang milabay sa ilang atubangan ang motorsiklo sa mga suspek apan sa pagbalik na, gilayon na sila gipangpusil sa makalimang higayon hinungdan sa dugu-ong hitabo.

Narekober sa crime scene ang lima ka bakante nga kaha sa caliber 45 ug slug nga gipaubos sa ballistic examination.

Gihatagan usab sa hugot nga seguridad sa mga biktima nga naka-admit pa sa opsital.

Gihimuan pa sa dugang imbestigasyon ang hitabo aron masuta ang utok sa kremin ug ang mismong mga mihimo sa pagpamusil.(Photos via Navarro Michael).