(Update) CAGAYAN DE ORO CITY – Nakuryentahan apan dili kusog ang bultahe ug anaa na usab sa maayong kahimtang ang duha ka sakop sa Bureau of Fire Protection o BFP) nga kabahin sa nakig-away sa dakong kalayo sa Cocogrove,Poblacion,Iligan City.
Kini subay sa kompirmasyon ni BFP Iligan City Fire Marshall Maj Butch Baulete kabahin sa pagkasunog sa pinuy-anan ni Imelda Tanaca nga paspas mikatag sa ubang silingang mga pinuy-anan.
Gibutyag ni Baulete nga anaa sa 20 ka pamilya ang apektado sa pagkasunog sa 7 ka balay diin giimbestigaran ang posibleng nabiyaa nga dinagkutang kandila ang tinubdan sa kalayo.
Miingon si Baulete nga hinoon walay mga sibilyan nga samaron o nakalas sa pag-ulbo sa dakong kalayo nga may 100-mil pesos nga estimated structural damage.
Dugtong usab niini,gilayong naghiusa sila si City Mayor Celso Regencia ug City Vice Mayor Jemar Vera Cruz sa paghatag sa dinaliang ayuda alang sa mga biktima sa sunog.
Kasamtangang nakisilong una sa kapilya ug ang uban midangop sa mga kabanay samtang nangita pa’g magamit nga pondo aron matindog balik ang ilang nasunog nga mga pinuy-anan.
