CAGAYAN DE ORO CITY-Nasikop sa kapolisan ang duha ka lalaki nga nagbaton sa kalibre 45 nga armas nga walay legal nga papeles diha sa Brgy Pagatpat sa syudad.
Giila ang mga dinakpan nga sila si Ruben Delgado ug Burcelino Vasquez nga pulos taga-Brgy Tubod, Iligan City.
Namugos si Delgado nga gipadala sila sa ilang agalon nga brgy kapitan aron hataga’g seguridad ang anak niini nga nagpuyo sa Brgy Pagatpat sa syudad.
Napakyas pag-presentar ang mga suspek sa lisensiya sa kalibre 45 nga armas hinungdan nga gisikop sila sa operatiba sa Bulua Police Station.
Gitakdang kasuhan sa Cagayan de Oro City Police Office o COCPO ilabina sa Bulua Police Station ang mga suspek sa piskalya sa syudad.
