CAGAYAN DE ORO CITY – Nakuha na sa retrieval team sa Philippine Air Force ang duha ka dagkong klase sa bomba nga karga sa nahagsa nga FA-50 fighter jet sa lasang sa Kalatungan,Brgy Mirayon,Talakag,Bukidnon.
Kini subay sa kompirmasyon ni PAF Tactical Operations Wing Eastern Mindanao commander Col. Ryan Reynie Sonza sa interbyu sa Bombo Radyo.
Gibutyag ni Sonza nga gikalipay nila nga wala makahimo’g pagbuto ang maong mga bomba nga dako’g ikahatag nga kadaot sa kinabuhi sa tawo nga maabtan sa kakusog sa puwersa niini.
Siya miingon nga ang maong klase sa mga bomba ang kontrolado ug dili sama sa world war 2 bombs nga sobrahan ka sensitibo kon matandugan nga gilayong mangbuto.
Dugang niini nga dili na usab magamit ang maong mga klase sa bomba kay peligro na kini alang sa ilang ga operasyon sa umaabot panahon.
Hisayrang namatay sa pagkahagsa sa maong eroplano sila late Major Jude Salang-oy ug 1Lt April John Dedulla samtang naghatag aerial support sa ground troops sa Philippine Army nga adunay operasyon batok sa 70 ka CPP-NPA combatants sa miaging Martes sa kadlawon.
