CAGAYAN DE ORO CITY- Nasikop sa magkalahing operasyon sa kapolisan ang duha ka empleyado sa city hall nga nalambigit sa pagbaligya ug gamit sa gidiling droga sa syudad kagabii.
Giila ni Carmen Police Station commander Sr/Insp Demver Vergara ang unang nasikop nga si Joeffrey Seirra,40 anyos,minyo ug residente sa Brgy 7 sa syudad.
Nasikop si Seirra kinsa regular employee sa city hall tungod sa pagkapaliti sa upat ka sachets sa suspected shabu diin nakuha usab ang 2-mil pesos nga marked money.
Samtang sa laing operasyon,nasikop usab sa Regional Intelligence Division sa PNP-10 si RTA enforcer Nelson Rimontigue Jr nga taga-Biasong,Brgy Macasandig ning syudad kagabii.
Si Rimontigue ang nasikop samtang giingong naggamit sa droga diha sa Brgy 17 sa syudad kagabii.
Una niini,giangkon ni Rimontigue nga tiggamitan kini’g droga kaniadto apan mihimakak nga namaligya’g gidiling droga sa syudad.
Samtang gibaharan ni City administrator Teddy Sabugaa ang city hall employees nga likayan ug dili malambigit sa pagbaligya sa gidiling droga.
Kini kon gusto pa sa mga empleyado sa city hall nga magpabilin sa ilang trabaho ug maka-retiro nga makadawat sa mga benepisyo niini.
Gihimo ni Sabugaa ang subling pasidaan tungod sa pagkasikop nila ni Seirra nga regular employee sa city hall ug Rimontigue sa magkalahing operasyon sa kapolisan ning syudad kagabii.
Dumduman nga walay hunong ang surprise drug test sa mga empleyado sa city hall sa dakbayan.
