CAGAYAN DE ORO CITY-Gitangtang sa ilang trabaho sa Ombudsman sila si Police Supt Michael John Deloso ug SPO3 Ernesto Galleto.
Kini tungod sa pagsilbing guilty sa kasong serious dishonesty and grave misconduct nga gipasaka sa kanhi Zonalibre program anchorman Atty Ernie Palanan sa Ombudsman.
Mismo si Palanan ang miduso’g kasong kurapsyon ug administratibo batok Deloso ug Galleto tungod sa pagpangilkil sa ilang operator-drivers association sa P6-mil kada-bulan sa miaging katuigan.
Sila Deloso ug Galleto ang nasikop sa entrapment operation sa NBI-10 sulod sa restaurant hotel diin nakuha kanila ang marked money niadtong Marso 2014.
Gimando usab sa Ombudsman nga kasuhan ang duha sa kasupakan sa anti-graft and corrupt practices act sa korte.
Gumikan niini, dili na makuha sa duruha ang ilang retirement benefit ug giwagtang na kanila ang ilang civil service eligibility.
Si Deloso ang kanhi deputy city police director for traffic office sa syudad dihang nahitabo ang ilang pagpangilkil batok grupo ni Palanan.
Ipatuman sa PNP-10 ang paglangkat puwesto kanila ni Deloso ug Galleto tungod sa kasong ilang giatubang sa Ombudsman.
Pasalig kini ni PNP regional spokesperson Supt Lemuel Gonda dihang nasayran sa Bombo Radyo nga
gitangtang na si Deloso ug Galleto sa ilang trabaho tungod sa kasong administratibo.
Si Gonda miingon nga hulaton nila ang kopya gikan sa Camp Crame aron pormal wad-on sa serbisyo ang duha ka police officials.
Si Deloso ang giingong ubos sa floating status sa Camp Alagar samtang nag-atubang sa kasong kurapsyon ug administratibo.
