(Update) CAGAYAN DE ORO CITY – Gihataga’g napulo ka adlaw sa CIDG 10 makatubag ang duha ka Chinese nationals ug ilang kaabag nga Pinoy kon nganong dili sila manubag sa paghimo’g illegal mining activities sa Zone 6,Sitio Manlauyan,Brgy Gango,Libona,Bukidnon.
Kini human nasuta nga walay permiso ang gold mining operation ug hupas na ang pasaporte sa duha ka Intsik sukad pa sa tuig 2022.
Giila ni Police Capt. Noel Oclarit ang mga dinakpan nga sila Wu Chun Mao o Lao Wu ug Wang Ping Yee o Lao Wang pulos taga-China ug temporaryo nagpuyo sa usa ka subdibisyon sa Brgy Macasandig sa syudad.
Gisikop usab ang sekyu nga si Junel Ermita nga taga- Brgy Lumbia atol sa pagsilbi sa search warrant batok kanila.
Gawas sa kalibre 38 nga armas nga nakompiskar,daghang gamitan paghimo’g bomba nga gamiton sa illegal mining operation ang nakompiskar gikan sa mga dinakpan diin sila gikasuhan sa illegal possession of firearms ug illegal possession of explosives.
