CAGAYAN DE ORO CITY – Gidala na sa Lumbia City Jail ang duha ka Chinese nationals nga nadakpan sulod sa usa ka hotel kauban ang pito ka mga menor de edad diha sa may Barangay Cugman ning syudad.
Kini human napasakaan na sa kasong ‘human trafficking’ ug child abuse ang mga suspek nga sila si Shen Zhi Qiang, 26-anyos ug Li Qi, 27-anyos nga pulos naggikan sa China.
Matud ni NBI-10 regional director Atty Patricio Bernales nga kabahin usab nga ilang ang duha ka mga bayot nga kauban sa 10 ka mga babaye nga giingong nagbugaw sa mga langyaw.
Una nang gibutyag sa NBI nga ilang gipangita ang usa ka babaye nga giingong responsable sa pag-recruit sa mga menor de edad gamit ang social media nga Facebook.
Samtang gipanganti sa Bureau of Immigration o BI nga ilang ipaubos sa blacklist ang duha ka Chinese nationals nga nag-atubang sa kasong human trafficking ug child abuse.
Miingon si Felipe Alano Jr kinsa BI Cagayan de Oro District’s alien control officer nga ila na lamang gihulatan nga mahatagan sila’g kopya sa National Bureau of Investigation sa kopya sa resolusyon sa City Prosecutor’s Office kalabot na sa reklamo batok sa mga langyaw.
Ipatuman usab sa BI ang proseso sa deportasyon kon ang mga suspek makombikto ug makaalagad sa ilang mga termino sa bilangguan.
Una nang gibutyag ni Bernales nga ila nang gipahibalo ang BI sa kaso sa duha ka Chinese nationals.
