CAGAYAN DE ORO CITY-Mohimo’g transport strike sulod sa duha ka adlaw ang pipila ka grupo sa transportasyon batok Dept of Transportation o DoTr sa Hunyo 5 ngadto 6 dinhi sa syudad ug lalawigan.
Matud ni National Confederation Transport Union o NCTU Northern Mindanao coordinator Joel Gabatan ila kining himoon kay ipatuman na sa gobierno ang pagwagtang sa mga jeep nag-edad 15 anyos pataas.
Sa miaging Pebrero ning tuiga,natala ang 85 porsiento nga pagka-paralisar sa transportasyon sa syudad tungod gihapon sa pagwelga sa NCTU ug STAREX-Pistons batok DoTr.
Samtang gikompirmar ni LTFRB regional director Allan Guro nga may omnibus guidelines nga nagtumong sa pagpatuman sa modernization program sa mga pangpasaherong sakyanan sa nasud.
Tuyo niini nga hulipan na sa mga transport operator ang ilang mga unit nga nag-edad 15 anyos pataas.
Apan giklaro ni Guro nga dili pa pirmado ni DoTR Sec Arthur Tugade ug wala usab sila masayod sa ensaktong unod sa kamanduan niini.
