CAGAYAN DE ORO CITY – Gikasuhan na sa pagsupak sa Customs Modernization and Tariff Act ang duha ka dinakpan nga nakuhaan sa halos 10 milyones pesos nga balor sa gitoohang smuggled cigarettes sa Brgy Piksan,Calanogas,Lanao del Sur.
Gibutyag ni Lanao del Sur Police Provincial Office Director Col. Robert Daculan nga nadakpan ang duruha nga sila alyas Nor ug alyas Al nga sakay sa kolor puti nga van karga ang 28-mil 500 ka reams sa sigarilyo sa checkpoint sa Calanogas Police Station ug 64th Infantry Batallion,Philippine Army sa lugar.
Nasuta nga pasulod sa Marawi City ang maong kontrabando dihang nasapon kini sa mga otoridad.
Gilayong gikustodiya sa kapolisan alang sa imbestigasyon ang duruha samtang ang kontrabando gilayong gitugyan sa Bureau of Customs-Cagayan de Oro alang sa dugang himoon nga mga lakang.
