CAGAYAN DE ORO CITY – Gikompirmar ni kanhi CPP-NPA member Ka Dina nga may pipila ka sakop sa media nga gihimo nila nga kasangkapan aron paspas mapakuyanap ang propaganda sa kalihukan nga alkontra sa gobierno.
Miingon si Ka Dina nga partikular niini ang usa ka magsisibya sa radyo kinsa kanhi usab lumilihok sa CPP-NPA dinhi sa rehiyon.
Gibutyag usab niini nga tahas usab sa komunistang grupo nga pormahon ang usa ka pundok sa media aron i-agi ang ilang mga pang-propaganda nga makapadani sa publiko nga masuko sa gobierno.
Samtang naglaum si 403rd Infantry Brigade commander Brig. Gen. Edgardo de Leon nga makatabang sa mga ginikanan nga nawad-a’g anak ang testimonya sa duha ka NPA rebel returnees nga sila si Ka Lalaine ug Ka Dina.
Miingon is De Leon nga nanghinaut siya nga magsilbi kining giya sa mga ginikanan sa mga organisasyon nga apilan sa ilang mga anak ingon man sa matag indibidwal nga masayod kon unsa nga klase ang grupo ang gipang-apilan.
Naglaum usab si De Leon nga pinaagi sa duha ka rebel-returnees mahataga’g kasayuran ang katawhan sa tinood nga nahitabo sama sa recruitment nga gihimo sa mga walhong grupo sa nagkadaiyang sektor sa katilingban.
