CAGAYAN DE ORO CITY – Gikasubo ni Municipal Mayor Atty. Alexis Quina ang kamatayon sa giingong tulo ka inahan nga pulos naanod sa kusog nga sulog sa tubig-baha sa spillway sa Brgy Camuayan,Balingasag,Misamis Oriental.
Kini human nakit-an na ang duha ka patay’ng lawas sa mga biktima nga naglakip ni Erlinda Dahay,66 anyos ug Jocelyn Caculba,58 anyos sa likod sa Rosario National High School ug pabiling missing pa si Melodina Salinay Ganzan,43 anyos nga pulos nagpuyo sa lugar.
Gilayong mihimo sa pagsusi si Quina sa nahitabuan kuyog ang iyang disaster officials ug uban pang mga anaa sa gobierno aron makamugna’g mga angayang lakang nga kaproteksyonan ang katawhan nga moagi sa spillway ilabina panahon sa taas nga tubig-baha sa lungsod.
Kabahin sa iyang pasidaan nga dili na pugson motabok ang katawhan sa spillway kung grabe na ang pagsaka sa tubig-baha aron kalikayan nga masubli ang gidangatan sa mga biktima.
Dumduman nga gikan pa trabaho ang mga biktima sa kompanya nga nakabase sa Villaneuva ning lalawigan ug paspas nanguli sakay sa suki nila nga bao-bao apan wala damha nga katapusang kadtong higayuna sa ilang kinabuhi kagabii.
Hisayrang pasado alas 9:00 na nakaabot sa spillway ang mga biktima ug naggunitay pa sa ilang mga kamot sa pagtabok dihang pulos sila gianod sa grabe kasulog nga baha.
