CAGAYAN DE ORO CITY – Nakaabot na ang duha ka mga medical doctors nga gipadala ni Department of Health (DoH) Sec Francisco Duque III aron maoy mosusi sa hinungdan sa pagka-food poison sa dul-ag 300 ka mga batan-on diha sa may Sitio Cedar, Barangay Impalutao Impasug-ong Bukidnon.
Si Bukidnon Medical Center chief of Hospital Dr Supicio Henry Legazpi miingon nga pokus ang mga eksperto sa pagsuta sa palibot sa maong lugar aron matumbok ang hinungdan sa pagkalipong, pagkalibanga ug pagsukasuka sa mga miyembro sa Seventh Day Adventist Reform Movement.
Samtang, gikumpirmar ni Dr Legaspi nga nakaggawas na sa balay-tambalanan ug pauli na sa ilang tagsa-tagsa ka mga lugar ang mga nadala sa hospital gawas lang sa usa ka pasyente nga bag-uhay lang na-confine.
Samtang,
gikumpirmar ni Legazpi nga napadala na nila sa Research Institute for Tropical Medicine o RITM sa kaulohan ang water ug rectal sample sa dul-ag 300 ka mga batan-on.
Siya miingon nga ila na lang gihulatan ang resulta sa gihimong pakisusi sa mga eksperto kung unsa ang nakadaut sa mga biktima.
Dugang pa niini nga kasamtangang gi-kordon nila karon ang lugar nga gihimong venue sa 8th National Youth Convention alang sa dugang imbestigasyon nga ilang himoon.
