CAGAYAN DE ORO CITY-Gibalhog sa Carmen Police Station ang duha sa lima ka mga kalalakihang gituohang sakop sa Maute terror Group sa Brgy. Kauswagan ning syudad kagahapon sa hapon.
Sa pakighinabi sa Bombo Radyo kang Brgy. Kauswagan Kag Artagne Pimentel, iyang gibutyag nga kadudahan ang lihok sa mga suspek nga nakasoot sa itom nga t-shirt, tag-as ug buhok ug nakaboots. Maoy nakapa-trigger sa mga molopyo sa maong barangay ang tinubagan sa mga suspek nga daw “menaranaw”.
Giila ang mga dinakpang suspek nga sila Armand Agocoy ug Jordan Abucayon, pulos hingkod ang panuigon ug
mga residente sa Salay, Misamis Oriental.
Na-corner ang mga suspek pinaagi sa citizen’s arrest.
Samtang namugos ang dinakpang suspek nga si Agocoy nga na-mistaken identity lamang sila sa mga otoridad.
Iyang gipanghimakak nga sila sakop sa mga terorista.
Gani, iyang gipamugos nga naka-duty pa siya sa sibyahan sa Bombo radyo isip reliber sa regular nga gwardiya
nga ni-absent niadtong adlaw’ng lunes Mayo 26.
Gitin-aw ni Agocoy nga nakaabot sila sa Brgy. Kauswagan kay gi-ubanan niya ang iyang kauban nga bag-ong hired nga sekyu aron pangitaon ang babayeng igsoon nga si Jennifer.
Iya usab gisupak ang gipasangil ni Pimentel nga sila nandagan ug nagpangutana kung pila kabook ang tulay sa Cagayan de Oro City.
Una niini, gikompirmar ni Sgt Jeremiah Casundo sa VV security Agency nga tinood nga mi-relibo kaniya sa paggwardiya sa Bombo Radyo si Agocoy.
