CAGAYAN DE ORO CITY – Managsama nga gikasuhan sa pagsupak sa Comprehensive Dangerous Drugs Act of 2002 ang duha ka empleyado sa city hall ug laing usa pa ka dinakpan sa piskalya ning syudad.
Kini human sila nadakpan sa magkalahing higayon sa mga operatiba sa Carmen Police Station ubos sa pagpangulo ni Major Mario Mantala Jr.
Una nang nadakpan sa buy bust operation ang empleyado nga si alyas Boy Suyop, 34 anyos,taga-Brgy Carmen ug ubos sa civil security unit sa city govt tungod sa pagbaton sa gitoohang shabu.
Nasundan ang pagka-dakpan ni alyas Boy Igmat kuyog ni alyas Boy Hinay diin sila nakuhaan sa pito ka sachets sa gitoohang shabu.
Si Igmat ang gikan gihapon sa civil security unit nga gitrabahuan ni Suyop.
Una nang nanganti si City Mayor Rolando ‘Klarex’ Uy nga walay palabyon nga mga empleyado sa city hall ug angay manubag kon padayon sila magsupak sa balaod kabahin sa ilegal nga droga.
