CAGAYAN DE ORO CITY-Kasuhan sa kapolisan sa reckless imprudence resulting in multiple homicide ang delivery van driver sa piskalya ning syudad sunod semana.
Kini human nag-resulta sa kamatayon sa magsoong Reno ug Richard Salazar ang dugu-ong bangga sa van ug motorsiklo sa Brgy Hermano,Balingasag,Misamis Oriental sa miaging adlaw.
Miingon ang PO2 Alfonso Capuyan sa Balingasag Police Station nga wala na makontrol sa suspek nga si Ferde Magnetico ang kalit pagpatim-aw sa motorsiklo sa iyang atubangan hinungdan sa hitabo.
Namugos ang suspek nga tungod sa gadanglog usab sa highway,naligyas ang mga ligid sa gimaneho niya nga delivery van.
Kon dili mahusay sa pamilya ug agalon sa suspek ang hitabo sa korte,hingpit kining mabilanggo aron atubangon ang kaso nga ipasaka batok kaniya.
