CAGAYAN DE ORO CITY – Nakurat ang municipal govt sa Manolo Fortich nga dunay sekreto nga mihimo’g treasure hunting sa Brgy Dalirig nga mi-resulta sa kamatayon sa duha nila ka residente sa Bukidnon.
Kini human kompirmaha ni Johnrey Soriano sa Manolo Fortich MDRRMO nga kalit nahugno ang dakong bato tungod sa bangag nga gikalot sa mga biktima nga sila Raul Gabuya,58 ug Bayot Banong,48 nga pulos nagpuyo sa maong brgy.
Namahayag si Soriano nga miabot pa sa 10 metros ang kalawmon sa nakalot nga yuta sa duruha ayha midat-og kanila ang dakong bato rason sa ilang kamatayon sa miaging adlaw’ng Domingo.
Gilayong gihaw-as ang mga patay’ng lawas sa mga biktima ug gidala sa ilang tagsa-tagsa ka mga pinuy-anan kagahapong adlawa.
