CAGAYAN DE ORO CITY – Natugyan na sa Balingasag Police Station ang duha ka kidnapped victims nga pulos menor de edad ug ang mismong suspek nga unang mitago sa Brgy Linggangao, Balingasag, Misamis Oriental gikan sa Brgy Tinago,Ozamiz City,Misamis Occidental.
Kini human akusahi ang suspek nga si Renato Ortiz Jr alyas Jonny Fortes nga taga-Purok 1,Brgy Tambacan,Iligan City nga maoy midagit sa duha ka magsoong menor de edad samtang nakisaka sa iyang kumpari sa Ozamiz City.
Miingon si Balingasag Police Station commander Police Maj. Arnold Gaabucayan nga nasubay sa PNP-Ozamiz City Anti-Kidnapping Group ang suspek tungod sa kuha nga CCTV footages sulod sa Ozamiz City Port diin misakay ang suspek kuyog ang mga biktima sa barko patabok sa Mukas Port sa Lanao del Norte.
Pamugos sa suspek nga gisuroy lang niini ang mga bata apan katingad-an kay hilom kining mihawa sa balay ug wala masayod ang amahan sa mga biktima.
Kasong kidnapping ang atubangon sa suspek kon may igong basehan ang kapolisan alang niini.
