CAGAYAN DE ORO CITY-Samaran ang duha sa 16 ka Grade 7 students sa Misamis Oriental General Comprehensive High School human maaksidente ang gisakyang de-pasayruang jeep diha sa Malasag, Brgy Cugman ning syudad.
Patungas ang mga biktima dihang mibuto ang brake sa jeep hinungdan sa aksidente.
Sumala ni SP03 Elmo Bultra, imbestigador sa Cugman Police Station nga duha sa biktima ang nakaangkon sa samad ug bun-og sa kalawasan ingon man sa ulo.
Wala mananghid sa maestra ug principal ang mga biktima nga magphoto-shoot sa maong lugar.
Samtang walay kasayuran si Misamis Oriental General Comprehensive High School o MOGCHS principal Pedro Estanio sa gihimong photo-shoot sa Grade 7 students diha sa Malasag, Brgy Cugman ning syudad.
Siya miingon nga iyang susihon kon may pagtugot ba sa iyang buhatan ang gihimo sa mga estudyante nga naaksidente sa maong lugar.
Gitin-aw ni Estanio nga dili niya gatugtan ang kapin 9-mil ka estudyante sa MOGCHS nga magpahigayon sa field trip ilabina kon walay kauban nga ginikanan o magtutudlo.
