CAGAYAN DE ORO CITY – Patay ang duha ka motorista sa magkalahi nga sirkumstansiya sa syudad sa El Salvador ug lungsod sa Tagoloan pulos sa Misamis Oriental kagahapong adlawa.
Una nang giila ni Cpl Aljun Quitiol sa El Salvador Police Station ang biktima nga si Reyjay Capili,20 anyos,ulitawo nga nagpuyo sa Kalabaylabay sa El Salvador City.
Nawad-an sa kontrol sa gimanehong motorsiklo ang hubog nga si Capili hinungdang nadisgrasya sa coastal road ug miambak sa lapyahan.
Samtang nagusbat usab ang atubangan ug luyo nga bahin sa lawas sa biktima nga si Jovannie Ragmac,26 anyos nga taga-Kolambog,Brgy Lapasan sa dakbayan.
Kini human unang mi-overtake sa kurbada nga bahin sa tulay sa Brgy Poblacion,Tagoloan hinungdan nasungag ni Ragmac sakay sa iyang motorsiklo ang mihunong na nga cargo truck.
Miingon si Sr Master Sgt Arnel Acero sa Tagoloan Police Station nga tungod sa kakusog sa impact,dead on the spot ang biktima.
Mobisita unta ang biktima sa iyang igsoon sa dihang natigayon ang aksidente samtang ubos sa kustodiya sa PNP ang truck driver nga si Norwell Vallar nga taga-Zamboanga del Norte.
