CAGAYAN DE ORO CITY – Nalubong na sa magkalahi nga menteryo ang duha ka sakop sa rebeldeng New People’s Army nga unang napatay sa laing engkuwentro sa Brgy Kibanban,Balingasag,Misamis Oriental.
Kini human natugyan na sa militar sa tagsa-tagsa ka pamilya ang mga patay’ng lawas nila ni Romer Hilogon Lig-ang nga taga-Brgy Banglay,Lagonglong ug Kevin Alicaño nga residente sa Brgy. San Juan, Balingasag ning lalawigan sa miaging adlaw.
Miingon si 58th IB commanding officer Lt Col Christian Uy nga subo man ang panghitabo apan gituman lamang nila ang tahas nga gisangon kanila nga e-mintinar ang kahusay’g kalinaw ubos sa ilang area of responsibility.
Siya miingon nga gitugyan na usab nila ang mga nabawi nga kalibre sa armas gikan sa mga rebelde diha sa Camp Evangelista,Brgy Patag ning syudad.
Sukad nangulo si Uy sa 58th IB,may lima ka NPA rebels na ang disgrasyang nakalas sa mga gilusad nga opensiba sa ilang hurisdiksyon.
