CAGAYAN DE ORO CITY – Gisalikway sa laing duha ka aktibong sakop sa rebeldeng New People’s Army o NPA ang kalihukang insurhensiya ug nakahukom pagtahan sa militarya sa Bukidnon.
Miingon si 10th ID,Philippine Army commanding officer Major General Allan Hambala nga gihimo ang pagdawat-balik kanila ni Loloy Puklawan,34 anyos ug Ronie Bagubay, 47 anyos sa Brgy Kibungcog,San Fernanado sa maong probinsya.
Gisaysay sa heneral nga sa wala pa motahan ang duruha balik sa gobierno, nagsilbi daw nga mga tigpangilkil sa mga mag-uuma sa bukiran sa Bukidnon.
Siya miingon nga napugos pagtahan ang maong mga rebelde tungod sa walay hunong paggukod sa tropa sa kagamhanan ug ang naghinobrang kakapoy ingon man kagutom sa kabukiran.
Napasayon ang pagtahan sa mga rebelde tungod sa paningkamot nila ni 89th Infantry Batallion commanding officer Lt Col Antonio Bulao ug 1003rd Infantry Brigade commander Brig Gen Marion Angcao.
Bitbit pagtahan sa duruha ang kalibre sa M4A1 carbine rifle ug KG9 machine pistol.
Hisayrang kasamtgangang gipatuman sa gobierno ang NTF-ELCAC aron matubag ang nagkadaiyang panginahanglan sa katawhan sa kabaryuhan nga dugay nang wala maatiman.
