CAGAYAN DE ORO CITY – Napatay sa militar ang duha ka sakop sa rebeldeng New People’s Army ug laing usa ang samaron nga nadakpan sa magkalahing operasyon sa rehiyon ning semanaha.
Gikompirmar ni 403rd IB commander Col. Michelle Anayron nga maoy napatay sa ilang 1st Special Forces Batallion ang usa ka Rebodin Binongkasan alyas Jeg nga sakop sa Platun Ipad, SRC-5 sa CPP-NPA sa Sitio Maambong,Brgy Tikalaan,Talakag,Bukidnon.
Miingon si Anayron nga nabawi sa ilang puwersa ang duha ka tag-as nga armas ug ubang kabtangan nga nabiyaan sa mga misibat nga rebelde human sa 45 minutos nga engkuwentro.
Samtang gitaho usab ni AFP Western Mindanao Command chief Lt Gen Roy Galido nga napatay usab sa ilang puwersa sa 10 ID,Philippine Army ang usa ka Jony del Pilar alyas Lingling ug nadakpan ang samaron nga si Joel Tomas alyas Jef-Jef.
Nakompiskar gikan sa encounter site ang M-16 rifle ug ubang kabtangan sa mga rebelde.
Giangkon usab ni Galido nga usa sa ilang sundalo ang samaron sa maong engkuwentro.
