CAGAYAN DE ORO CITY – Patung-patong nga kaso ang atubangon sa duha ka gitoohang sakop sa New Peoples Army (NPA) nga nakig-engkwentro sa kapulisan ug militar dool sa bansuhan sa Purok 12, Barangay Tongantongan, Valencia City,Bukidnon.
Base sa impormasyon, kapin kun kulang alas 2:30 sa hapon nakadawat sa tawag gikan sa concerned citizen ang Valencia City Police Station batok sa upat ka gidudahang armadong lalaki sakay sa duha ka motorsiklo nga nagbaras-baras sa maong lugar.
Paspas nakigkoordinar ang kapolisan sa 2nd PMFC Bukidnon Provincial Police Office, 1003rd RMFB, 88IB,Philippine Army ug MIG 10 ISAFP diin milusad sa hot pursuit operation.
Nakorner ang upat ka gitoohang gapangilkil sa bansuhan alas 4:30 sa hapon.
Unang mipabuto sa armas ang mga suspek nga nagresulta sa binayluay sa buhing bala.
Samaran nga nadakpan sa mga otoridad ang duha ka gitoohang NPA SPARU membvers nga giila nga si Frederic Tagura alyas Rek-rek, ug Pedeng Matikinong alyas Santo, pulos miangkong miyembro sa Company “Thunder,” SRC 2, Guerilla Front 6 sa NCMRC.
Gitin-aw ni Police Lt. Col. Surki Serenas nga bisan gamay ra ang samad sa mga biktima, ila gihapon kining gidala sa balaytambalanan.
Narekober sa crime scene ang duha ka unit sa kalibre 45 nga armas nga dunay 13 ka bala, 1 granada, upat ka blasting caps, XRM nga motor, mga tambal ug subersidong dokumento.
Gikustodiya na kapolisan ang duha ka nasikop na suspek.
