CAGAYAN DE ORO CITY-Gipaniguro sa PDEA-10 nga dili na makagawas sa prisohan ang kanhi piniriso nga si Enrico Guwico human subling nadakpan pinaagi sa drug buy bust operation sa Carinugan,Brgy. Balulang ning syudad kagahapong adlawa.
Gibutyag ni PDEA agent Ben Calibre nga kuyog nadakpan sa maong operasyon mao ang iyang kapikas nga si Gina Guwico.
Nakuha sa posisyon sa magtiayon ang 15 gramos nga gimbut-aton sa pakete sa shabu nga nagbalor sa P80-mil nga street value.
Gawas niini, gikompiskar sa PDEA ang 500 pesos ang buy bust money, ilang celphone nga posibleng nagbaton sa ngalan sa ilang buyers, ug ang ilang gipanag-iyahang motor.
Giangkon ni Calibre nga pipila na kabulan nilang gi-obserbahan ang target person nga si Enrico sa pagtuo nga nagbag-o na kini human madismis ang kaso.
Samtang detinado usab sa PDEA mini-cell ang laing magtiayon nga suspek pagbaligya’g gidiling droga diha sa Sitio Pinikitan,Brgy Camaman-an ning syudad.
Giila ni PDEA agent Ben Calibre ang mga suspek nga sila si Abdul ug Asniya Canandatu,pulos hingkod ang panuigon ug nagpuyo sa maong lugar.
Nakuha gikan sa mga suspek ang bana-banang 5 gramos nga gitoohang shabu diin balor sa 30-mil pesos.Gihikay na ang kaso batok mga suspek aron isang-at sa piskalya ning syudad sa sunod semana.
