CAGAYAN DE ORO CITY – Mitala sa duha ka paring Katoliko nga ubos sa Diocese sa Malaybalay City ang nangamatay tungod sa pagkatakdi sa COVID-19.
Kini human kompirmaha ni Diocese of Malaybalay City spokesperson Fr Vir Delfin ang kamatayon sa laing pari nga si Fr Pablo Salengua kinsa kura paroko sa simbahang Katolika diha sa lungsod sa Manolo Fortich,Bukidnon.
Gibutyag ni Delfin nga posibleng natakdan si Salengua sa direct contact sa unang namatay nga si Fr Diomedes Brigoli kay nagtambong kini sila sa usa ka kasaulugan sa lungsod sa Libona sa miaging mga semana.
Miingon si Delfin nga sama kang Brigoli,ipaubos usab nila sa cremation ang patay’ng lawas ni Salengua ug ipahimutang sa kaugalingon nila nga menteryo sa diocese sulod ning semaha.
Si Brigoli ug Salengu ang pulos nadala sa Northern Mindanao Medical Center gikan sa Maria Reyna-Xavier University Hospital tungod sa pagka-grabe sa ilang mga balatian.
Samtang gikasubo sa Archdiocese sa Cagayan de Oro ang pagpanaw sa duha ka paring Katoliko nga nakabase sa sister diocese nila nga nakabase sa Malaybalay City,Bukidnon.
Miingon si Msgr Rey Manuel Monsanto,consultor sa Archdiocese sa Cagayan de Oro nga pulos estudyante niya ang mga pari nga namatay nga sila si Brigoli ug Salengua nga namatay tungod sa paghambin sa coronavirus disease.
Gibutyag ni Monsanto nga kini ang hinungdan nga hugtanon sila gidid-an ni Archbishop Jose Cabantan nga magkita-kita una sulod ning bulana aron kalikayan nga matakdan.
Una nang nagbaton sa sa siyam ka pari ubos dinhi sa arkidiyosisis nga positibo sa bayrus.
