CAGAYAN DE ORO CITY- May gihuptan na nga person of interest ang Lanao del Sur Provincial Police Office kuyog ang 6th ID,Philippine Army sa mga suspek nga miluthang patay sa duha ka construction worker ug gikaangol sa laing usa sa Area- 1, Brgy Emmie Punud, Marawi City, Lanao del Sur kaganina sa buntag.
Giila ang namatay nga sila Jorge Butad ug Arturo Macasero, pulos hingkod ang edad ug molopyo sa Matampay, Matungao, Lanao del Norte.
Samaron usab si Dave Morsua.
Gibutayag ni Police Col. Madzgani Mukaraam, direktor sa Lanao del Sur Police Provincial Office nga pulos naka motorsiklo ang mipusil sa mga trabahante.
Blangko pa ang mga otoridad kon unsa ang hinungdan sa linoog nga hitabo.
Gikondinar ni Mukaraam ang duguong insidente ug namulong nga binuhatan kini sa mga dautang tawo.
Sa pagkakaron, nagpabiling kritikal ang usa ka samaron nga milanding Amai Pakpak Medical Center.
