CAGAYAN DE ORO CITY – Self-accident ang pagkahulog sa pangpang sa kumong-kumong trak nga kargado sa mga utan diin nag-resulta sa kamatayon sa mismong drayber niini ug iyang kapikas sa Sitio New Bohol,Barangay Canituan,Kalilangan,Bukidnon.
Kini subay sa gihimong imbestigasyon sa kapolisan kabahin sa pagka-aksidente sa trak nga gikan sa lungsod sa Wao,Lanao del Sur ug padulong unta sa Cagayan de Oro City aron itumod ang ilang mga produktong agrikultura sa miaging adlaw’ng Domingo.
Gibutyag ni Police Corporal Richter Sorongon,imbestigador sa Kalilangan Police Station nga sobra ka lugsungon,tungason ug sikuhon ang kalsada nga nasubay sa trak hinungdang nawad-an sa kontrol kay danlog usab kay nag-ulan atol sa hitabo.
Kini ang rason nga mibangga ang trak sa metal barrier ug milahos sa pangpang ingon man midusmo sa dakong punuan sa kahoy.
Siya miingon nga dead on the spot ang wala pa panganli nga drayber pag-abot sa ospital kay grabeng naipit sa trak.
Milagpot usab ang kapikas niini padulong sa Ulayan river ug nakit-ang patay na pipila ka oras gikan sa ngilngi nga aksidente pagkasunod adlaw.
Samaron usab ang 7-anyos nga anak sa magtiayong namatay ug laing pito pa ang samaron nga sakay sa maong trak de karga.
Hinoon,pulos na luwas ang mga kahimtang sa mga samaron ug nakagawas na sa ospital kay dili grabe ang mga nahaiguman nila nga bun-og sa aksidente.
Gisaysay usab sa kapolisan nga may lain pang biktima nga milugpot gihapon sa trak nga pabiling gipangita kay missing pa.
