CAGAYAN DE ORO CITY – Gipangunayan sa pagtabang sa kompanyang Fuzo Negro ang mga pamilya sa ilang duha ka empleyado nga nalumos-patay samtang kamulo’g haw-as sa hugaw sa gilimpyuhang septic tank sa Brgy Luyong Bonbon,Opol,Misamis Oriental.
Kini human wala damha nga mahutdan sa gininhawa ang mga biktima nga sila Alemar Campomanes,31 anyos nga taga-Valencia City,Bukidnon ug Manuel Manseguiao,27 anyos nga residente usab sa Balingasag, Misamis Oriental dihang kamulo nga hinlo sa septic tank sa usa ka tindahan sa maong lugar kagahapon sa hapon.
Gibutyag sa imbestigador sa hitabo nga si Police Staff Sgt Jeffrey Abellanosa sa Opol Municipal Station nga nadiskobre nila ang kamatayon sa duruha kay gitawgan sila sa mga personahe sa Opol Healtyh Center kay una kining nadala aron unta hatagan sa first aid.
Apan sumala sa OHC personnel nga wala na’y sinyales nga ilang nakit-an nga buhi pa ang mga biktima.
Kini ang hinungdan nga gikuha na usab ang mga biktima sa mga taga-punerarya aron pasiunang maatiman ayha itugyan sa mga tagtungod niini.
Giklaro usab sa kapolisan nga wala nahulog ang duruha sa bangag apan hukom nila nga sudlon ang tangke rason nga wala nila nasugakod ang kaisog sa baho ug sila nawad-an sa panimoot.
