CAGAYAN DE ORO CITY – Gikasubo sa City Disaster Risk Reduction and Management Department o CDRRMD-Cagayan de Oro nga nakalas ang duha ka residente epekto sa pagka-anod sa tubig-baha gumikan sa mga pagbundak sa ulan dala sa panagtagbo sa duha ka ikog sa hanging mainit ug bugnaw o Intertropical convergence zone (ITCZ) sa syudad.
Kini human kompirmaha ni CDRRMD manager Nick Jabagat ang pagkahaw-as sa mga patay’ng lawas nila ni Hontrado Plata,31 anyos nga taga-Brgy Tumpagon ug Wilfredo Manggubat nga residente usab sa Brgy Cugman ning dakbayan.
Si Plata naanod kay gisugat niini ang puwersa sa baha diin nakit-an ang patay’ng lawas niya sa suba sa Brgy Iponan.
Samtang si Manggubat ang mihimo sa pagluwas sa usa ka babaye nga naapsan as tubig-baha sa Mapawa,Brgy Cugman.
Apan gisulayan pa’g kuha sa biktima ang motorsiklo sa maong babaye hinungdang gianod kini sa tubig-baha rason sa iyang kamatayon sa miaging semana.
Subay sa data sa Office of the Civil Defense o OCD-Manila,walo ka tawo na ang patay sa mga pagbaha sa Mindanao region diin duha niini gikan sa syudad.
Dugtong niini,gihangyo ni Jabagat ang kabarangayan nga mohimo sa pag-aktibo sa ilang disaster response teams aron kalikayan nga adunay pipila ka residente nga mabugtuan sa kinabuhi gumikan sa mga makaliton nga pagbaha sa syudad.
Gihimo ni Jabagat ang pasidaan epekto sa duha ka residente nga namatay gumikan sa pagka-igo sa baha sa miaging semana.
Partikular nga gi-alerto sa CDRRMD ang mga brgy nga ilado nga taas ang kaso sa landslides ug nagsilbing flood prone areas sanglit gitakda nang mosulod ang rainy season sa nasud.
