(Update) CAGAYAN DE ORO CITY – Patay ang pulis ug laing armado nga sibilyan sa nahitabong pinusilay sa police checkpoint sa Poblacion,Libertad,Misamis Oriental kagabii.
Kini human gipugngan sa kapolisan makalusot ang kolor puti nga Mitsubishi nga sakyanan diin nakasakay ang upat ka armadong kalalakihan gikan dinhi sa syudad.
Miingon si Misamis Oriental board member Dexter Yasay,chairman sa peace and order committee sa Sangguniang Panlalawigan nga giila ang namatay nga si Police Staff Sgt Ronald Caayupan samtang samaron usab si Chief Master Sgt Maestrado.
Gibutyag ni Yasay nga unang miduol ang usa sa mga suspek sa nahimutangan ni Caayupan bitbit ang kalibre 45 nga armas ug sekreto niini nga gipusil ang dughan hinungdan nga paspas mibalos ang mga pulis iyang gikauban sa checkpoint.
Nakasibat ang tulo sa mga suspek diin usa kanila ang armado pa sa wala matino nga armas rason nga gilusad sa kapolisan ang pursuit operation.
Una nang nakadawat sa impormasyon ang mga otoridad nga adunay sakyanan nga kargado sa mga high powered firearms ug mga granada.
Samtang nakurat ang ig-agaw sa namatay’ng pulis nga si Caayupan sa kalit nga kamatayon niini sa nahitabong shootout usa ka checkpoint kagabii.
Gibutyag ni Jeffrey Corpuz nga ilang nadungog ang sunod-sunod nga boto sa armas apan wala sila manggawas sa ilang panimalay tungod sa gibateng kahadlok.
Asoy niini nga naila niya nga buotan ug maayo nga tawo si Caayupan hinungdan nga gisayangan siya sa kalit nga kamatayon niini.
Una nang gibutyag ni Corpuz nga dugay na nga pangandoy sa iyang ig-agaw ang mahimong usa ka police oifficer.
