CAGAYAN DE ORO CITY – Gihimuan pa’g dugang imbestigasyon sa Lumbia Police Station ang dugu-ong aksidente diin nag-resulta sa kamatayon sa duha ka batan-on ug laing kauban ang seryoso ang kahimtang sa Sitio Langag,Brgy Dansolihon ning syudad sa kagahapon sa kadlawon.
Unang giila ni Police Executive Master Sgt Roberto Libres sa Lumbia Police Station ang mga biktima nga sila John Lloyd Saria,15 anyos ug Kyle Caberos, 13 anyos nga dead on the spot ug angol si Clint Dave Villarasa, 15 anyos nga pulos nagpuyo sa maong brgy.
Sumala sa imbestigasyon ni Libres, sakay sa motorsiklo ang mga biktima apan pag-abot sa kurbada nga bahin nasungag niini ang nakapara nga trak nga kargahanan sa kahoy’ng palpakata.
Tungod sa kakusog sa impact sa bangga,dead on the spot si John Lloyd ug Kyle samtang si Clint Dave gidali pagdala sa ospital aron mahatagan sa medikasyon.
Gumikan niini, gitinguha sa mga otoridad nga ilhon ang tag-iya sa maong sakyanan ug ang drayber alang sa himoon usab nga imbestigasyon.
Gitoohan nga nag-joy ride ang mga biktima ug wala nagdahom nga masungag ang trak hinungdan sa aksidente.
Hisayrang napasok ang mga biktima ilawom sa sakyanan hinungdang duha ang patay ug usa ang kritikal sa hitabo.
