CAGAYAN DE ORO CITY – Gipapha ni City Police Director Col Henry Dampal ang commander ug deputy commander sa Macabalan Police Station 5 ning syudad.
Kini tungod sa sunod-sunod nga kapalpakan nga naglakip sa kamatayon sa piniriso nga si Kim Troy Francisco nga unang gipatoo nga naghikog sulod sa pansayan ug ang pagka-eskapo sa laing duha ka suspected drug pushers sulod selda sa miaging semana.
Gibutyag ni Dampal nga tuyo niini nga dili mabalda ang imbestigasyon sa maong mga hitabo.
Maoy gi-relib sila si Maj Naomi Cudilla ug deputy commander nga si Lt June Paulette Docallos tungod sa pagka-eskapo nila ni Joseph Cainoy ug Danny Boy Panandigan ug misteryosong kamatayon ni Francisco sa miaging semana.
Gitahasan ni Dampal si Captain Raymund Masongsong nga modumala sa estasyon aron dili mabalda ang serbisyo publiko niini.
Samtang gihulat na ni Police Regional Office 10 Director Brig Gen Rolando Anduyan ang opisyal findings sa pag-imbestigar sa duha ka hitabong kapalpakan sa Macabalan Police Station 5 ning dakbayan.
Kini human bisan si Anduyan ang nakurat kon nganong nakahigayon sa giingong pagluglog sa li-og si Francisco sulod sa pansayan hinungdan sa kamatayon niini.
Gibutyag ni Anduyan nga dili nila palabyon ug kon gikinhanglan mohimo usab sila sa parralel investigation aron matumbok kon dunay pagpasagad sa naka-duty nga mga pulis sa maong mga hitabo.
