CAGAYAN DE ORO CITY -Mapun-an ang mga kasong kriminal nga atubangon sa duha ka piniriso nga unang naka-eskapo apan subli ra nga nadakpan sa hot pursuit operation sa kapolisan diha sa Purok 3-A,Brgy Gusa ning syudad.
Naka-eskapo pinaagi sa paggabas sa kabilya sa prisohan sa Agora Police Station sila Joshua Fortis ug Sam Babion rason nga gilayong gipangita sa mga otoridad.
Gibutyag ni Agora Police Station commander Capt Ernesto Sanchez nga may mga kasong pagbaligya sa ilegal nga droga ug motornapping ang duruha nga gitakda nang isaka sa city jail sa Brgy Lumbia ning syudad.
Gisiguro usab niini ang pagpahugot pa sa ilang inspection sa tanang mga bisita nga magdala ug mga pagkaon ug mga gamit sa mga piniriso aron malikayan nga adunay makasulod nga mga kontrabando.
Samtang wala magbasol nga subli nadakpan ang duruha ka detinado sa selda apan gibulgar niini nga ‘gidampot’ lamang kini sa mga pulis aron dunay magsilbing accomplishment sa ilang operasyon.
Kini ang gibutyag sa dinakpan nga si Fortis nga taga-Brgy Gusa ning syudad.
Miingon si Fortis nga kanhi na kini nabalhog sa Lumbia City Jail tungod sa pagbaligya’g ilegal nga droga apan dugay na daw kini nga nagbag-o sa kinabuhi.
Dismayado kini sa mga otoridad kay siya ang gipuli nga dakpon kay wala makuha ang target operation sa miaging adlaw.
