CAGAYAN DE ORO CITY – Dako’g posibilidad nga malugwayan pa sa laing mga adlaw ang class suspension sa elementary ug high schools students nga nakabase sa Brgy Lapasan ning syudad.
Kini kon mograbe ang kainit sa adlaw o heat index nga nag-apektar sa dul-an napulo ka tinun-an sa duha ka tunghaan pinaagi sa pagkasunggo ug paghilanat.
Kini ang rason nga nakahukom si Lapasan Punong Brgy Julito Ogsimer kinuyugan sa mga prinsipal sa East City Central School ug Lapasan National High School nga ipatuman ang upat ka ka adlaw nga suspensiyon sa klase sugod kagahapong adlawa.
Samtang ilugwa ni City Mayor Rolando ‘Klarex’ Uy diin nagtugot sa kadagkuan sa DepEd-Cagayan de Oro nga makig-koodinar sa brgy officials aron gilayong makahukom sa class suspension sa mga bata kon mosamot pag-init ang temperatura sa dakbayan.
Kini human gilugwa sa DOST nga anaa a 39 degrees celcius ang heat index karong adlawa samtang 40 degrees celcius usab pag-abot sa adlaw’ng Domingo.
Una nang naglugwa’g pagtugot si Pres. Bongbong Marcos ngadto sa local govt units nga naglakip sa kabarangayan paghimo’g inisyatiba paghikling sa mga bata kon mabati na ang grabeng kainit sa tagsa-tagsa ka lokalidad.
