CAGAYAN DE ORO CITY – Patung-patong nga kaso ang atubangon sa duha ka police official nga nalambigit sa pagpangilkil sa Wao Lanao del Sur.
Giila ni Counter Intelligence Task Force o PNP-CITF commander Police Col Romeo Caramat ang mga dinakpan nga sila Police Staff Sergeant Jeffrey Romero Fabros ug Police Master Sergeant Erwin Piquero pulos na-destino sa Wao Municipal Police Station.
Gisaysay ni Caramat nga mihimog extortion activities ang duruha sa usa ka amahan sa suspek nga napriso sa ilang istasyon gumikan sa kasong ilegal possession of fire arms.
Base sa inisyal nga report, mihatag ang amahan sa dinakpan sa balor 100,000 pesos aron kini makagawas sa prisohan.
Midangop gilayon sa PNP CITF head office ang reklamante nga amahan nga nailang si Laut Madale human subling nag-demand sa P200,000 ang duha ka police aron maminusan ang kaso sa nga gi-atubang sa iyang anak.
Gilayong milusad sa entrapment operation ang PNP CITF ug naaktuhan ang duruha nga midawat sa P50,000 marked money.
Gikostodiya una ang duha ka pulis sa Lanao del Sur Provincial Police Office.
