CAGAYAN DE ORO CITY – Nag-negatibo ang duha ka indibidwal nga sa sintomas sa corona virus nga unang na-admit sa Northern Mindanao Medical Center o NMMC sa syudad.
Kini subay sa resulta nga gipadala sa Rural Institute of Tropical Medicine o RITM nga misusi sa sampling gikan sa mga biktima.
Miingon si DoH regional director Dr Adriano Subaan nga nagpasabot nga anaa na lamang sa tulo ka personalidad ang gikonsiderar nga person under investigation o PUI gumikan sa pagduda nga nagbaton sa sintomas sa bayrus.
Masaligon usab si Subaan nga unta negatibo gihapon ang resulta aron dili na makuhaan ang gibati nga kabalaka sa publiko batok sa maong sakit.
Samtang gitahasan sa DILG-10 ang gobernadores padulong sa brgy kapitanes nga magsilbing local crisis managers batok sa pagkuyanap sa corona virus dinhi sa rehiyon.
Gihimo ni DILG regional director Arnel Agabe ang apelar tungod sa pagsaka sa persons under investigation o PUI ngadto sa kapin gatus diin lima ang gikan sa Northern Mindanao.
Miingon si Agabe nga angayang magbaton sa usa lamang ka gabayan ang matag- opisyal aron mapadali ang pag-responde kon may tawo nga madudahan nga magbaton sa maong sakit.
Dugtong niini,gitun-an ni City Mayor Oscar Moreno ang pagpalit sa thermal scanners nga magamit pag-detect kon ang usa ka tawo posibleng nagbaton sa sintomas sa corona virus nga mosulod sa syudad.
Kini sa pagsiguro nga paspas mahibaw-an ang usa ka tawo nga naghupot sa mga sintomas sa maong sakit.
Miingon ang mayor nga hinoon dili magdali-dali ang syudad sa paghupot niini ilabina nga walay direct flights gikan abroad ang mga eroplano nga manugpa diha sa Laguindingan Airport sa Misamis Oriental.
