CAGAYAN DE ORO CITY – Gikasuhan sa qualified theft ang empleyado sa Air 21 Cargo nga suspek pagpangawat sa balor 2 milyon pesos nga sampling medicines gikan sa Department of Health o DoH sa ilang gihimo nga operasyon sa Purok 9, Brgy Pala-o, Iligan City.
Kini human gibaligya ni Jalilodin Bangcola, 41 anyos ang mga tambal nga adunay marka nga “not for sale” sa usa ka negosyante nga si Florencia Hinampas nga nagpuyo sa maong lugar.
Namahayag si NBI-Iligan City District Officer Atty. Abdul Dimaporo nga ilang narekober ang mga tambal sa tindahan ni Hinampas nga gipabantayan sa iyang pag-umangkon nga si Dindo Ebarle, 40-anyos sa maong lugar.
Gibutyag ni Dimaporo nga ihatod ni Bangcola sa consignee ang mga tambal inay iya kining gibaligya tungod kay nagkinahanglan siya’g dakong salapi.
Giangkon usab sa suspek nga dugay na niya kini nga gihimo.
Una niini, nakapyansa sa kasong Anti-Fencing Law si Ebarle samtang detinado sa bilangguan human gikasuhan sa qualified theft si Bangcola.
