CAGAYAN DE ORO C ITY- Giila sa liderato sa 4th ID,Philippine Army nga bayani ang pagbuhis sa kinabuhi sa duha ka sundalo sa magpila ka adlaw nga engkuwentro tali sa Guerilla Front Committee 4-B sa mga rebeldeng NPA sa bukirang bahin sa Misamis Oriental.
Kini human namugos ang militar nga gilikay sa duha ka sundalo sa pagkadamay ang mga sibilyan hinungdan nga naigo ang maong mga sundalo sa indiscriminate firing sa mga rebelde sa bukirang bahin sa Sugbongcogon ning lalawigan.
Gibatikos ni 4th ID,Philippine Army spokesperson Capt Joe Patrick Martinez ang gihimo sa mga rebelde nga pagpasagad sa seguridad sa mga sibilyan diin nagresulta pagkaangol sa laing 3 ka sundalo atol sa maong engkuwentro.
Samtang gihupay ni Misamis Oriental PDRRMO Executive Director Fernando Dy Jr ang gibati nga kabalaka sa katawhan kabahin sa nahitabo nga engkuwentro tali kasundaluhan ug rebeldeng NPA sa mga utlanang bahin sa kalungsuran sa lalawigan.
Kini ilabina kon hisgutan ang pagbisita sa mga turistang lokal o langyaw ngadto sa ilado nga mga tourist spot sa probinsya.
Si Dy miingon nga dili peligro ang seguridad sa mga mobisita sa tourist spots sa probinsya ilabina nga nahitabo ang engkuwentro nga layo ra sa mga sentro sa kalungsuran sa Sugbongcogon,Talisayan,Salay,Binuangan,Kinoguitan ug Balingoan sa miaging adlaw.
