CAGAYAN DE ORO CITY – Kasuhan sa kapolisan sa reckless imprudence resulting to homicide ug damage of property batok sa sundalo nga nakabangga-patay sa usa motorista sa Sayre Highway P-4, South Poblacion, Maramag, Bukidnon.
Giila ni Maramag Police Station commander Lt Col Casan Ali ang suspek nga si PFC Whalter Gem Jaralba kinsa na-destino sa 88th IB,Philippine Army samtang ang biktima naila nga si Nilo Mamon, 47-anyos, minyo ug residente sa P-5A, South Poblacion, Maramag, Bukidnon.
Si Ali miingon nga may tulubagon usab ang suspek ingon man ang backride niini sa motorsiklo nga si PFC Fhielmar Felisilda sa kasupakan sa health protocol batok Covid-19 gumikan sa kasupakan sa “No Backride Policy”.
Nahitabo ang aksidente dihang kalit mi-liko si Mamon sakay sa iyang motorsiklo hinungdan nga mibangga kini sa duha ka mga sundalo.
Tungod sa kakusog sa impact sa panagbangga,dead on arrival sa ospital ang biktima.
