CAGAYAN DE ORO CITY – Napasaka na ang kasong paglapas balaod kabahin sa paghupot sa ilegal nga armas ug mga kasangkapan paghimo’g bomba batok sa duha ka minerong Intsik ug usa ka Pinoy sa piskalya sa Bukidnon.
Kini human nadakpan sa hiniusang operasyon sa PNP-CIDG 10 ug Iligan City District Office ingon man sa Libona Police Station ang maong suspected ilegal miners sa Zone 6,Sitio Manlauyan,Brgy Gango sa miaging adlaw.
Giila ni CIDG 10 office Capt. Noel Oclarit ang mga dinakpan nga sila Wu Chun Mao o Lao Wu,minyo;Wang Ping Yee o Lao Wang nga pulos taga- China nga temporaryong nagpuyo sa Woodland Heights Subd,Brgy Macasandig ug giingong sekyu nila nga si Junel Ermita nga taga- Brgy Lumbia sa dakbayan.
Miingon si Oclarit nga gisikip ang mga suspek subay sa mando sa korte gumikan sa pagbaton sa kasamtangang paghimo’g bomba nga gamiton nila sa pagpabusikad sa tunnel o bukid aron manguha’g mga bulawan sa lugar.
Nabawi gikan sa suspek ang kalibre 38 nga armas ug daghang kagamitan paghimo sa eksplosibo.
