CAGAYAN DE ORO CITY-Gipanganti sa kapolisan nga modaghan pa ang ihap sa mga tawo nga makalas kon dili mohunong sa pagpayuhot sa ilegal nga droga sa kalungsuran sa Misamis Oriental.
Gihimo ni Police Insp Princess Joy Enriquez,tigpamaba sa Misamis Oriental Provincial Police Office ang katin-awan nunot sa kamatayon sa laing duha ka suspected pushers nga giingong misukol sa anti-illegal drug buy bust operation sa Brgy Casinglot,Tagoloan ning lalawigan kagabii.
Giila ang mga suspek nga sila si Albert Bengcal,34 anyos,tricab driver ug John Mark Maglacion,welder ug ekstrador jeep driver nga pulos nagpuyo sa maong lungsod.
Nahiagom sa tag-upat ka pinusilan ang dughan ug likod sa mga suspek dihang nagpakita’g pagsukol sa mga pulis gikan sa Tagoloan Police Station ug Provincial Drug Enforcement Unit sa Misamis Oriental PNP sa maong lugar kagabii.
Nakuha gikan sa mga suspek ang tagsa ka gitoohang sachets sa suspected shabu,500 pesos nga marked money,granada ug kalibre 38 nga armas.
Si Maglacion ug Bengcal ang ikanapulo nga suspected pushers nga napatay sa kapolisan kay misukol sulod tulo ka bulan ning tuiga.
