CAGAYAN DE ORO CITY – Gihikay na sa kapolisan ang kasong murder nga ilang ipasaka batok sa tulo ka lalaki nga responsable pagdunggab-patay sa ‘grab driver’ nga igo ra nakig-date sa iyang hinigugma nga babaye sa coastal road sa Brgy Lapasan ning syudad.
Giila ni Agora Police Station deputy commander Lt Macario Linog ang biktima nga si Cris Semaña, 24 anyos,ulitawo nga residente sa Western Kolambog sa maong brgy.
Gibutyag ni Linog nga nakasukol pa ang mag-uyab apan wala na sila’y nahimo kay may kargada nga mga kutsilyo ang mga suspek hinungdang napulo ka samad-dinunggaban ang naangkon ni Semaña.
Dugang ni Linog nga dili pa igo,giingong gilugos pa sa mga suspetsado ang trato sa biktima nga 17 anyos pa lamang ang edad.
Gitoohan nga tulis ang motibo kay gikawat sa mga suspek ang celhone ug 7-mil pesos nga salapi sa grab driver.
Samtang kusganong gihimakak sa duha sa tulo ka suspek nga sila ang responsable pagdunggab-patay sa grab driver ug paglugos usab sa menor de edad nga hinigugma niini diha sa coastal road,Brgy Lapasan ning syudad sa miaging kadlawon.
Kini human nasikop ang mga suspek nga sila si Erwin Adame nga taga-Saint John,Brgy Puntod ug Rolly Bahian Mitula nga taga-Brgy Tablon ning dakbayan.
Gibutyag ni Adame nga nakurat na lamang sila nga kalit sila nga gipangdampot sa mga pulis ug gidala sa Agora Police Station.
Apan sulti pa sa mga otoridad nga mismo ang rape victim nga babaye ang mitudlo kang Adame nga kabahin sa giingong milugos kaniya.
