CAGAYAN DE ORO CITY-Gisignit sa Armed Forces of the Philippines ang duha ka gialegahan nga medics sa New Peoples Army o NPA sa Brgy Macabalan ning syudad.
Gibutyag ni Starex-Piston Northern Mindanao Sec Gen Ringo Lago nga gikuha sa militar sila si Gloria Denden Jandayan ug Gleceria Jandayan Balangiao sa ilang gipuy-an bisan walay warrant of arrest.
Gipamugos ni Lago dili sila NPA members apan human rights advocates.
Gani,miingon si Lago nga niadtong panahon sa paghapak sa bagyong Sendong sa syudad mitabang pa si Balangiao ug Jandayan sa mga nabiktima.
Samtang gidepensa sa militar ang alegasyon nga pagsignit sa duha ka gitoohang miembro sa medical team sa New Peoples Army ning syudad.
Miingon si 403rd Philippine Army Civil Military Officer Capt Ryan Layug nga wala dakpa ang duha apan usa lamang ka imbitasyon ang ilang gihimo.
Matud ni Layug nga ang mga personahe sa brgy ang miapas sa pinuy-anan sa duha aron makigkita sa mga sundalo.
Wala na namahayag si Layug sa rason sa imbitasyon apan giklaro niini nga daan na silang gahimo sa pag-imbetar sa mga sibilyan nga adunay alegasyon nga sakop sa mga rebelde.
