CAGAYAN DE ORO CITY-Patay ang duha ka drug suspects human giingong misukol sa drug buy bust operation sa mga operatiba sa Brgy Patrocinio, Claveria Misamis Oriental.
Matud ni C/Insp. Dennis delos Santos, hepe sa Claveria Municipal Police Station nga target sa ilang operasyon si Samsudin Tamano, legal age ug residente sa Brgy Carmen ning syudad.
Atol sa operasyon giingong misukol ang suspek kauban iyang higala nga si Alberto Andales, construction worker, residente sa Villanueva, Misamis Oriental gamit ang .38 kalibre nga armas hinungdan nga napusilan sa mga operatiba.
Narekober sa crime scene ang 5 sachet sa shabu ug duha ka .38 caliber pistol.
Gikumpirmar ni delos Santos nga gawas-sulod sa bilangguan ang target suspek nga si Tamano.
Si Delos Santos miingon nga nabilanggo kaniadto ang suspek tungod sa illegal nga droga.
Dugang niini nga dugay na nila nga gimonitor ang illegal nga binuhatan sa suspek ilabina nga nagsilbi kini nga supplier sa shabu sa nasangpit nga lugar.
Nasakit ang igsoon sa gipatay’ng si Andales sa kamatayon niini.
Matud ni Maria Andales nga walay kamatooran ang report sa mga pulis nga misukol ang iyang igsoon sa drug operation.
Siya miingon nga nasayod siya nga dili kabalo moggamit sa armas si Alberto.
Gusto ni Ginang Andales nga magpasaka’g kaso batok sa mga pulis apan dili niya kini mahimo tungod sa ilang kalisod.
Samtang naglaum si Claveria Mayor Miraluna Salvacion Abrogar nga magsilbing leksyon sa ilang mga residente ang kamatayon sa duha ka drug suspects nga misukol sa operasyon.
Sumala ni Abrogar nga nalipay siya sa nahimong accomplishments sa mga pulis.
Dugtong niini, giawhag niya ang mga nahabilin nga tigpayuhot sa illegal nga droga ubos sa ilang area of responsibility nga mohunong na sa maong illegal nga binuhatan aron dili mamatay.
Giangkon usab si Abrogar nga number 1 sa pinakadaghan nga drug pusher ug users ang Brgy Patrocinio.
Gibutyag ni Abrogar nga mihimo na siya sa mga lakang aron mapugngan ang paghitak sa illegal drugs sa ilang lugar.
Gibulgar usab niini nga naggikan ning syudad ang supplier sa druga ubos sa iyang area of responsibility.
