CAGAYAN DE ORO CITY – Depensahan sa duha ka dinakpan nga nagpalusot sa gitoohang inismagol nga sigarilyo ang kasong pagsupak sa Tax Reform Act of 1997 nga gipasaka sa kapolisan sa piskalya sa Ozamiz City,Misamis Occidental.
Kini human naharang sa 2nd Provincial Mobile Force Company sa Misamis Occidental Philippine National Police ang L300 van nga gisakyan sa mga suspek nga sila alyas Berto 30 anyos ug Tope,29 anyos nga pulos taga-Barangay Baliwasan,Zamboanga City.
Sumala ni Police Regional Office 10 Director Brig Gen Jaysen De Guzman nga gisusi sa ilang tropa ang maong sakyanan diin nadiskobre ang 2-mil 049 ka smuggled cigarettes nga walay gikapakita nga mga papeles.
Gilayong gikompiskar ang maong kontrando diin nagkantidad sa P1.2 million ug gitugyan sa taga- Bureau of Customs alang sa dugang imbestigasyon.
Tungod niini,gipahalipayan sa PRO 10 ang ilang mga kauban nga walay hunong ang paggukod sa mga tawo nga nalambigit sa smuggling activities nga naglihok dinhi sa Northern Mindanao.
