CAGAYAN DE ORO CITY – Giwagtang na ni City Mayor Oscar Moreno ang sobra duha ka tuig nga pagpatuman sa curfew hours nga unang gitumong nga limitahan ang kalihukan ug pagtapuk-tapok sa katawhan sa matag-gabii sa syudad.
Kini gumikan kay gitumbok sa mga eksperto nga super spreader sa COVID-19 infections ang panagtigom ilabina sa mga okasyon sama sa mga pag-inom.
Gi-anunsyo kini sa mayor pinaagi sa iyang pagpalugwa sa mando-ehekutibo nga gilayong mi-epekto kagabii.
Apan istritko usab nga gisugo ni Moreno ang mga otoridad nga dili magsagad sa kahusay ug kalinaw ilabina nga gilauman ang pagpanggawas sa daghan mga tawo gumikan sa pagwagtang na sa curfew hours.
Sukad nahatagan na sa bakuna ug booster shoots ang katawhan,may mga higayon nga magbaton na sa ‘zero cases’ sa bayrus ang mga ospital sa dakbayan.
Samtang gihagit sa mga negosyante ang kapolisan nga balansihon ang sitwasyon kabahin sa pagluag na sa health safety protocols nunot sa pagwala na sa curfew hours sa dakbayan.
Miingon si Antonio Uy,presidente sa Misamis Oriental Filipino-Chinese Chamber of Commerce Incoporated nga bintahan kini kanila nga mga negosyante ug mga empleyado kay mabalik ang ilang mga kinitaan.
Apan maoy kabalaka usab ni Uy kon mosiaw ang pipila ka badlungon sa katilingban ug makahimo’g kremin nga mohatag usab ka-peligro sa mga residente sa dakbayan.
Una nang gisulti sa NEDA-10 nga hingpit nang nakabango’g balik ang kahimtang sa ekonomiya sa tibuok Northern Mindanao.
Dugtong niini,dili lamang angay mabalaka ang publiko ilabina ang mga negosyante bisan kon lifted na o wagtang na ang sobra duha ka tuig nga curfew hours sa dakbayan.
Pasalig kini ni Cagayan de Oro City Police Office spokesperson Maj Evan Viñas gumikan sa gipalanog nga kahingawa sa mga negosyante sa security adjustment nga ipatuman sa syudad.
Miingon ang opisyal nga daghan pa sila’g nabilin nga paagi aron maabog ang mga dautan ug mamintinar ang kahusay’g kalinaw sa dakbayan.
